Ba wai kwallaye da nasara kaɗai suka ɗauki hankali a Gasar Cin Kofin Afirka (AFCON) da ake gudanarwa a Maroko ba, har ma da labaran mutane masu cike da darasi da suka fito daga cikin filayen wasa da kuma wajen su.
Daga cikin fitattun labaran, akwai na wani magoyin bayan Jamhuriyar Dimokuradiyyar Kongo, Michel Coca Mbuladinga, wanda ke tsayawa tsayin daka a duk lokacin da ƙasarsa ke wasa, yana ɗaga hannunsa sama domin tunawa da marigayi Patrice Lumumba, Firayim Minista na farko na ƙasar da aka kashe a 1961. Wannan hali nasa ya ja hankalin jama’a har ma da shugaban CAF, Patrice Motsepe.
A ɓangaren ’yan wasa, an yi matuƙar sha’awar labarin ɗan wasan Burkina Faso, Georgi Minungo, wanda ke taka leda duk da rasa ganin ido ɗaya. Duk da ƙalubalen da ya fuskanta, ya taka rawa wajen kai ƙasarsa zagaye na gaba, abin da ya sa ya zama abin koyi ga matasa da dama a Afirka.
Haka kuma, wani magoyin bayan Maroko mai larurar rashin gani, Mohamed Boukhaliq, ya yi tafiyar fiye da kilomita 560 domin zuwa kallon wasannin ƙasarsa. Tafiyarsa ta ja hankalin jama’a tare da karfafa gwiwar masu nakasa.
Ba a manta da labarin magoyin bayan Aljeriya ba, Mohamed Dastnasin, wanda ya taso daga Indiya ya ratsa ƙasashe da dama, yana tafiyar kusan kilomita 18,000 — mafi yawansu a kan keke — domin ya halarci gasar ya kuma mara wa ƙasarsa baya.
Waɗannan labarai sun tabbatar da cewa ƙwallon ƙafa ba wasa kaɗai ba ne, hanya ce ta haɗa mutane, tunawa da tarihi, da kuma gina fata. Gasar AFCON da ta fara ranar 21 ga Disamba kuma za ta ƙare a 18 ga Janairu, ta bar tarihi mai zurfi a zukatan ’yan Afirka.
