Senegal, wadda ta rike ƙwallo fiye da Masar, ta fi rinjaye a wasan, yayin da Masar ta fi mayar da hankali kan kare gida. Wannan nasara ta ci gaba da nuna rinjayar Senegal a kan Masar, bayan doke su a wasan ƙarshe na AFCON 2022 da kuma wasannin share fagen gasar cin kofin duniya, duk ta bugun fenareti.
Shugaban tawagar Masar, Mohamed Salah, ya fuskanci tsauraran matakai daga tsaron Senegal, lamarin da ya hana shi yin tasiri sosai. Wannan ne karo na biyar da Salah ke taka leda a AFCON, inda mafi kusanci da ya yi da kofin shi ne zama na biyu sau biyu.
A farkon wasan, Kalidou Koulibaly na Senegal ya samu katin gargadi bayan minti 17, katinsa na biyu kenan a jere, wanda ya hana shi damar buga wasan ƙarshe. Haka kuma, Koulibaly ya ji rauni bayan mintuna kaɗan daga baya, inda aka maye gurbinsa da Mamadou Sarr.
Duk da rinjayar Senegal a rabin farko, babu wata babbar barazana da ta jefa tsaron Masar cikin matsala, yayin da mai tsaron ragar Masar, Mohamed El Shenawy, ya dakatar da wasu hare-hare cikin sauƙi.
An samu ɗan ɗumi tsakanin bencin ƙungiyoyin biyu a dab da hutun rabin lokaci, inda kocin Senegal Pape Thiaw da na Masar Hossam Hassan suka yi kira da a kwantar da hankali bayan sa hannun alkalin wasa.
A rabin na biyu, Senegal ta ci gaba da matsa lamba, yayin da Masar ke ƙoƙarin hana su samun damar kai hari. Sai dai a minti na 78 ne ƙoƙarin Senegal ya biya, lokacin da Mané ya ci kwallo bayan wata harba daga nesa ta Lamine Camara ta karkata zuwa gare shi, inda ya zura ta cikin raga.
Da wannan nasara, Senegal ta samu tikitin zuwa wasan ƙarshe na AFCON, inda za ta kara da Morocco ko Najeriya, yayin da aka shirya buga ɗayan wasan kusa da na ƙarshe daga baya a ranar.
