Ministan harkokin wajen Isra’ila, Gideon Saar, ya isa yankin Somaliland a ranar Laraba, matakin da ke nuna sabon babi a dangantakar Isra’ila da yankin da ya ayyana kansa a matsayin mai cin gashin kai daga Somaliya. Wannan ziyara na zuwa ne kusan makonni biyu bayan da Isra’ila ta amince da Somaliland a hukumance a watan Disamba.
Rahotanni daga kafafen yaɗa labaran Isra’ila sun ce ana sa ran Gideon Saar zai gana da Shugaban Somaliland, Abdirahman Mohamed Abdullahi, domin tattauna batutuwan da suka shafi alaƙar diflomasiyya da haɗin gwiwa tsakanin ɓangarorin biyu. Wata majiyar diflomasiyya daga Somaliland ta shaida wa tashar i24NEWS cewa ganawar na da matuƙar muhimmanci ga dangantakar ɓangarorin.
Haka kuma, ana sa ran bangarorin biyu za su gudanar da taron manema labarai na bai ɗaya daga bisani a wannan rana, domin bayyana sakamakon tattaunawar da aka yi. Masu lura da al’amuran siyasa na ganin wannan ziyara a matsayin wani muhimmin mataki da ka iya haifar da sauye-sauye a siyasar yankin Kahon Afirka.
