Gwamnatin Nijeriya ta yi watsi da matakin da Isra’ila ta ɗauka na amincewa da Somaliland a matsayin ƙasa mai cikakken ’yancin kai. Nijeriya ta ce wannan mataki ya saɓa wa dokokin ƙasa da ƙasa tare da barazana ga zaman lafiya da tsaron yankin Kusurwar Afirka.
A ranar Juma’a Isra’ila ta zama ƙasa ta farko da ta amince da Somaliland, yankin da ya ayyana kansa tun 1991 bayan yakin basasa a Somalia, duk da cewa ba a taɓa amincewa da shi a matakin Majalisar Ɗinkin Duniya ba.
Nijeriya ta fitar da sanarwa mai ƙarfi tare da sanya hannu kan wata sanarwar haɗin gwiwa daga sama da ƙasashe 20, inda ta bayyana cikakken goyon bayanta ga ƙasar Somalia a matsayin ƙasa guda mai cikakken ikon mallakar yankinta.
Mai magana da yawun Ma’aikatar Harkokin Waje, Kimiebi Ebienfa, ya jaddada cewa Nijeriya na ci gaba da mutunta ƙa’idojin kare ikon ƙasa, haɗin kai, da cikakken ’yancin siyasa na Somalia. Ta kuma yi kira ga duniya da kada ta amince da kowace ɓangare na Somalia a matsayin ƙasa mai zaman kanta, domin hakan zai iya ƙara ta’azzara rikice-rikice a yankin.
