Rundunar ’Yan Sanda ta Najeriya ta dakatar da shirin fara hukunta masu amfani da tinted glass a faɗin ƙasar, bayan kotu ta bayar da umarnin dakatar da aiwatar da dokar na ɗan lokaci. A baya rundunar ta sanar da cewa za a fara aiwatar da dokar daga 2 ga Janairu 2026, domin ƙara tsaro a ƙasar.
A cikin sanarwar da kakakin rundunar CSP Benjamin Hundeyin ya fitar, ya ce matakin ya yi daidai da umarnin kotu da aka bayar tun 17 Disamba 2025, inda aka jawo rundunar gaba don kare kanta a shari’ar. An dage sauraron karar zuwa 20 Janairu 2026, don ci gaba da shari’a.
Rundunar ta ce saboda bin doka da girmama kotu, an dakatar da dukan matakan hukunta masu tinted glass a halin yanzu, har sai kotu ta yanke hukunci. Babban Sufeton ’Yan Sanda, IGP Kayode Egbetokun, ya ce rundunar za ta ci gaba da kare rayuka da dukiyoyi cikin bin doka da dabarun tsaro na zamani. Rundunar ta yi alkawarin sanar da jama’a duk wani sabon mataki bayan hukuncin kotu.
