Kamfanin sararin samaniya na SpaceX mallakin attajirin Amurka Elon Musk ya sanar da jinkirta shirin zuwa Mars, yana mai cewa yanzu kamfanin zai fi ba da fifiko ga gina wani “birni mai yawaita kansa” a Wata. Musk ya bayyana hakan ne a wani sakon da ya wallafa a dandalin X, inda ya ce ana iya cimma burin gina birni a Wata cikin kasa da shekaru goma.
A cewarsa, tafiya zuwa Mars na bukatar jerewar taurari sau daya duk bayan watanni 26, tare da tafiyar kusan watanni shida, yayin da zuwa Wata na yiwuwa kowane kwana goma, kuma tafiyar na daukar kwana biyu kacal. Wannan bambanci, in ji Musk, na nufin za a iya kammala aikin gina birni a Wata da sauri fiye da na Mars, duk da cewa shirin Mars bai mutu ba—ana sa ran zai fara aiki a kusan shekaru bakwai masu zuwa.
Rahoton The Wall Street Journal ya ce SpaceX ta shaida wa masu zuba jari burinta na sauka a Wata a watan Maris na 2027, tare da tunanin sayen xAI domin tallafawa ayyukan cibiyoyin bayanai na basirar wucin gadi a sararin samaniya. Rahoton ya kuma nuna cewa Musk na son tallafa wa gina wata cibiyar zama mai dorewa a Wata.
A baya, SpaceX ta bayyana aniyarta ta tura jiragen Starship zuwa Mars, har ma da shirin aika guda biyar a karshen 2026. Haka kuma, NASA ta taba kulla yarjejeniya da SpaceX don bunkasa Starship domin jigilar ’yan sama jannati zuwa saman Wata—amma a yanzu, fifiko ya koma kan Wata a matsayin matakin da zai fi sauri wajen “tabbatar da makomar bil’adama,” a cewar Musk.
Majiyar Labari: AA
