Akalla mutane uku sun mutu yayin da wasu bakwai suka jikkata sakamakon harin drone da aka danganta da dakarun Rapid Support Forces (RSF) a jihar Sennar, Sudan. Sudanese Physicians Network ta ce harin ya auku ne da dare a Asibitin Al-Mazmoum, inda cikin wadanda suka jikkata har da ma’aikacin lafiya.
Kungiyar likitocin ta yi kakkausar suka kan harin, tana mai cewa kai farmaki kan cibiyoyin lafiya babbar karya ce ga dokokin kasa da kasa. Ta kara da cewa irin wadannan hare-hare na kara jefa fararen hula cikin wahala tare da tauye damar samun kulawar lafiya.
Ya zuwa yanzu, RSF ba ta fitar da wata sanarwa ba kan zargin. Tun bayan barkewar rikici, hukumomin Sudan da kungiyoyin kare hakkin dan Adam sun dinga zargin bangarorin yaki da kai hare-hare kan muhimman ababen more rayuwa na fararen hula.
Kungiyar Lafiya ta Duniya (WHO) ma ta nuna damuwa kan ci gaba da kai hare-hare kan bangaren lafiya a Sudan. Rikicin da ke tsakanin rundunar sojin Sudan da RSF, wanda ya fara tun 2023, ya haddasa babbar matsalar jin kai, da mutuwar dubban mutane, da kuma raba miliyoyin jama’a da muhallansu.
Majiyar Labari: AA
