Serikali ya Sudan imefanya sherehe mjini Port Sudan kutangaza kurejeshwa kwa vito vya kale 570 vilivyoibiwa wakati wa machafuko ya kisiasa na kijeshi.
Katika hafla hiyo, Waziri wa Utamaduni, Habari na Utalii Khalid Al-Eisir alisema vito hivyo vinawakilisha urithi wa kihistoria kuanzia enzi za kale hadi zama za kisasa, na kurejeshwa kwake ni ushindi mkubwa wa kitaifa. Alisisitiza kuwa hatua hiyo inaonyesha dhamira ya Sudan kulinda na kudai tena mali yake ya kitamaduni.
Makumbusho ya Sudan yalipoteza maelfu ya vito vya thamani, vingi kutoka Ufalme wa Kush wa takriban miaka 3,000 iliyopita, kufuatia mapigano kati ya jeshi la Sudan na RSF yaliyolipuka Aprili 2023. Ingawa baadhi ya vito vilisafirishwa kwa magendo nje ya nchi, kurejeshwa kwa sehemu hii ni hatua muhimu ya kulinda urithi wa taifa.
CHANZO: TRT Afrika
