Aƙalla jiragen yaƙi na Amurka kirar F-22 guda 12 sun sauka a wani sansanin sojin saman Isra’ila a ranar Talata, a daidai lokacin da ake fuskantar ƙarin tashin hankali da Iran. Gidan talabijin na gwamnati KAN ya ruwaito cewa saukar jiragen na cikin shirin tura dakarun Amurka a yankin Gabas ta Tsakiya.
Rahoton ya bayyana cewa F-22 na daga cikin jiragen yaƙi mafi ci gaba a duniya, kuma Amurka ce kaɗai ke mallakar su. Daga cikin ayyukansu akwai shiga yankin maƙiyi da kuma lalata tsarin kariyar sararin samaniya da na’urorin radar.
Wannan mataki na zuwa ne yayin da Amurka ke ƙara ƙarfafa kasancewar sojojinta a yankin Tekun Fasha, sakamakon barazanar matakin soja kan Tehran idan tattaunawar nukiliya da ake yi ta gaza.
