A wani abin al’ajabi da ya ja hankalin masana lafiya, wata mata mai shekaru 30 da ta ɗauki ciki a madadin wasu ta haifi jarirai huɗu a Cibiyar Kiwon Lafiya da Haihuwa ta Walking Egg da ke Pokuase a yankin Greater Accra na Ghana. Haihuwar ta gudana ne ta hanyar Intrauterine Insemination (IUI), hanya ce ta taimakon haihuwa da ba kasafai ake samun jarirai huɗu a cikinta ba.
Babban Daraktan cibiyar, Dakta Nana Yaw Osei, wanda ya jagoranci aikin haihuwar, ya bayyana cewa samun jarirai huɗu ta hanyar IUI abu ne mai matuƙar wuya, domin ba kamar IVF ba, inda ake iya sarrafa yawan ƙwayoyin halittar da ake dasawa a mahaifa. “A IUI, ba za ka iya tantance adadin ƙwayoyin da za su kama ba. Yawanci muna tsammanin ɗaya ko biyu kacal,” in ji shi.
Ya ce uwar ta shafe ciki lafiya ba tare da wata matsala mai tsanani ba, inda aka yi mata haihuwa a mako na 36 don kariya. Likitocin yara sun duba jariran – maza biyu da mata biyu – kuma duk an same su cikin koshin lafiya, kowannensu na da nauyin sama da kilo biyu.
Dakta Osei ya ƙara da cewa ba a yi rage adadin jariran ba (foetal reduction) saboda dalilai na addini da ɗabi’a, inda ya ce hakan a wajensa ya yi daidai da zubar da ciki. Haka kuma ya bayyana cewa ɗaukar ciki huɗu na da haɗari sosai, amma wannan lamari ya gudana cikin sauƙi fiye da yadda ake tsammani, abin da ya sa ya zama abin mamaki a fannin fasahar taimakon haihuwa.
Ya kuma yi tsokaci kan al’adar ɗaukar ciki a madadin wasu a Ghana, yana mai cewa yawanci mata masu zaman kansu ne ke yin hakan, galibi saboda dalilai na kuɗi, kuma ana tabbatar da cewa sun riga sun haihu a baya kafin su shiga irin wannan shiri.
