Rundunar ‘yan sanda ta Kebbi ta tabbatar da cewa babu wanda ya mutu ko ya ji rauni bayan fashewar da aka ji a Asibitin Gwamnati na Bagudo da sassafe ranar Talata, 30 ga Disamba, 2025. Rundunar ta tabbatar da cewa mutane na cikin tsaro kuma komai yana karkashin kulawa.
A cewar sanarwar, jami’an tsaro haɗe da Soji da ‘yan sa-kai sun gaggauta kewaye wurin domin hana duk wani barazana ga jama’a. Haka kuma, ƙwararrun jami’an EOD-CBRN sun isa wajen domin gudanar da cikakken bincike kan abin da ya haddasa fashewar.
An tabbatar da cewa wani gini a cikin masaukin ma’aikatan asibiti ya lalace, amma duk mazaunan wurin sun riga sun fita kafin faruwar lamarin, lamarin da ya taimaka wajen kare rayuka.
Kwamishinan ‘yan sanda ya umarci ƙarin jami’an tsaro su ci gaba da sintiri a yankin, yayin da ake ci gaba da gudanar da cikakken bincike domin gano musabbabin fashewar.
