Wannan labari ya sake rage fata kan samun zaman lafiya, domin Rasha ta zargi Ukraine da yunƙurin kai hari kan gidan shugaban ƙasarta Vladimir Putin da ke arewacin ƙasar, kodayake ba ta gabatar da hujjoji kai tsaye ba, lamarin da Kyiv ta musanta tana cewa ƙarya ce kawai don karya tattaunawar zaman lafiya.
Rasha ta ce tana sake duba matsayinta a tattaunawar bayan abin da ta kira yunƙurin hari, lamarin da ke iya rage bege ga samun yarjejeniya. Wannan ya biyo bayan ganawar Shugaba Donald Trump da Volodymyr Zelenskiy a Florida, inda Trump ya ce tattaunawa na kusantar samo mafita duk da akwai matsalolin yankuna.
Putin ya umurci sojojinsa su ci gaba da yunƙurin kwace cikakken ikon yankin Zaporizhzhia, tare da sake nanata bukatar Ukraine ta janye dakarunta daga sauran sassan Donbas. Rasha ta ce an yi yunƙurin harin ne ta hanyar jirage marasa matuki 91 a yankin Novgorod, amma duk an tarwatsa su ba tare da asara ba.
Ministan Harkokin Waje Sergei Lavrov ya ce wannan aiki “ta’addanci ne na jiha,” yana mai cewa Rasha za ta ɗauki matakin ramawa.
Ukraine ta musanta zargin gaba ɗaya, inda Zelenskiy ya ce wannan ƙarya ce da Rasha ke ƙirƙirawa don samun hujjar kai hari kan Kyiv da kuma lalata tattaunawar zaman lafiya. Ma’aikatar harkokin wajen Ukraine ta nemi shugabannin duniya su yi Allah wadai da wannan tuhuma.
Har yanzu batutuwan yankunan Donbas da tashar nukiliyar Zaporizhzhia suna daga cikin manyan kalubale a tattaunawar. Rasha na riƙe da kusan kashi 20% na kasar Ukraine, ciki har da Crimea da ta mamaye tun 2014.
