A wani mataki da ya jawo hankali a siyasar Amurka, wasu sanatocin Republican biyar sun bi sahun dukkan ’yan Democrat na Majalisar Dattawa domin neman a sake duba ikon Shugaba Donald Trump na kaddamar da yaƙi kan Venezuela. Matakin na zuwa ne yayin da Majalisar Dokoki ke shirin kada ƙuri’a kan ƙudirin da zai taƙaita yiwuwar kai hare-hare ba tare da cikakken amincewar majalisa ba.
Majalisar Dattawa ta amince da ƙudirin ne da ƙuri’u 52 suka mara masa baya, yayin da 47 suka ƙi. Wannan na nufin an buɗe hanya ga ƙuri’ar ƙarshe, ’yan kwanaki bayan jami’an Amurka sun kama Shugaban Venezuela, Nicolas Maduro, tare da matarsa Cilia Flores, a wani farmaki da aka ce ya hallaka aƙalla mutane 100 a ranar 3 ga Janairu.
Yanzu haka, ƙudirin zai tafi Majalisar Wakilai, inda makomarsa ba ta da tabbas, duba da irin ƙin amincewar da aka yi a baya da kuma yiwuwar Shugaba Trump ya ƙi rattaba hannu a kansa, duk da ƙaramin rinjayen da jam’iyyar Republican ke da shi.
A gefe guda, Trump ya bayyana cewa Amurka na da ikon “kulawa da Venezuela” tare da sarrafa albarkatun man fetur ɗinta a nan gaba. A wata hira da jaridar New York Times, Trump ya nuna cewa hakan na iya ɗaukar lokaci mai tsawo, yana mai cewa “lokaci ne kawai zai nuna” tsawon wannan mataki.
Duk da haka, Tsarin Mulkin Amurka na tanadar da cewa dole ne shugaban ƙasa ya samu amincewar Majalisar Dokoki kafin kaddamar da aikin soja na dogon lokaci. Wasu sanatocin da ke adawa da ƙudirin sun jaddada cewa kama Maduro aiki ne na ’yan sanda, ba aikin soja ba.
Maduro dai na fuskantar shari’a a kotun Amurka bisa zargin safarar miyagun ƙwayoyi da makamai, zarge-zargen da ya musanta.
