Shugaban Amurka Donald Trump ya yi gargaɗin cewa Cuba tana fuskantar mawuyacin hali idan ba ta yi yarjejeniya da ƙasarsa ba “kafin lokaci ya wuce”, lamarin da ya biyo bayan kamo shugaban Venezuela Nicolás Maduro a wani aiki na sojoji na musamman na Amurka a Caracas mako guda da ya wuce.
Trump ya wallafa a shafin sa na Truth Social cewa ba za a sake aika mai ko kuɗi daga Venezuela zuwa Cuba ba — zero! kuma ya ƙarfafa Cuba ta nemi “yarjejeniya” da Amurka a yanzu.
Ya kuma ce Cuba ta dade tana dogaro da mai da kuɗi daga Venezuela a matsayin musayar tsaro, amma wannan lokacin ya ƙare.
Tun kafin wannan jawabi, an bayyana cewa sojojin Amurka sun kama Maduro da matarsa kuma aka kwace iko da su don fuskantar tuhuma a kotu a New York.
Trump ya ci gaba da nunawa cewa Venezuela ba ta buƙatar ƙarin karewa daga Cuba, domin yanzu Amurka ita ce ƙasar da za ta tallafa wa Venezuela daga ɓangaren tsaro, a cewarsa.
Gwamnatin Cuba ta yi martani cewa ta ƙi cewa tana shiga harkokin cikin gida ko karɓan umarni daga waje, tana mai cewa tana da haƙƙin shigo da mai daga duk inda suka ga dama ba tare da tsangwama daga Amurka ba.
Trump ya kuma sake mayar da martani ga wani sako da ya nuna cewa Ministan Harkokin Wajen Amurka Marco Rubio, ɗan asalin Cuba, zai iya zama shugaban Cuba — inda Trump ya ce “yana da kyau a gare ni!”
