Gwamnatin Tarayya ta Najeriya ta sanya hannu tare da ƙaddamar da sabuwar yarjejeniya da Kungiyar Malaman Jami’o’i (ASUU), matakin da ake sa ran zai kawo ƙarshen rikice-rikicen aiki da yawan yajin aiki a manyan makarantu.
An rattaba hannu kan yarjejeniyar ne a ranar Laraba a dakin taro na TETFund da ke Maitama, Abuja, inda manyan jami’an gwamnati da na ASUU suka halarta, ciki har da Ministan Ilimi, Dr. Tunji Alausa, da Ministan Ilimi na Ƙasa, Farfesa Suwaiba Ahmad.
Shugaban ASUU, Farfesa Chris Piwuna, ya bayyana fatan cewa wannan karo zai bambanta da baya, yana mai cewa ƙungiyar na sa ran aiwatar da yarjejeniyar ba tare da barazanar yajin aiki ba. Ya ce ASUU na bude kofarta don tattaunawa kamar yadda gwamnati ke cewa tana da buɗaɗɗen ra’ayi.
A nasa jawabin, Ministan Ilimi ya bayyana yarjejeniyar a matsayin muhimmin sauyi a tarihin ilimin jami’a a Najeriya, yana mai danganta hakan da ƙudirin Shugaba Bola Ahmed Tinubu na tabbatar da ingantaccen ilimi da kalandar karatu mara yankewa.
Ministan Kwadago da Aiki, Mohammed Dingyadi, ya yi kira ga bangarorin biyu da su aiwatar da yarjejeniyar cikin gaskiya da haɗin kai, yana mai cewa hakan zai dawo da amincewar ɗalibai, iyaye da al’umma baki ɗaya.
A bangaren Majalisar Dattawa, Shugaban Kwamitin Jami’o’i da TETFund, Sanata Muntari Dandutse, ya ce yarjejeniyar na nuni da wani muhimmin mataki na gina makomar ilimi mai ɗorewa a ƙasar.
Daga cikin muhimman abubuwan da yarjejeniyar ta ƙunsa akwai ƙarin albashi ga malaman jami’a da kashi 40 cikin 100, wanda zai kasance ta hanyar CONRAISS da kuma consolidated academic tools allowance. Haka kuma, an amince da sabon professorial cadre allowance ga cikakkun Farfesoshi da Readers na cikakken lokaci, domin ƙarfafa ƙwazo da rage ficewar ƙwararru zuwa ƙasashen waje.
