A wannan makon, kotu a birnin Los Angeles za ta fara sauraren wata shari’a da ake ganin za ta iya shafar yadda ake kallon manyan kamfanonin kafafen sada zumunta a duniya.
Ana zargin kamfanonin ne da ƙirƙirar manhajoji da nufin janyo hankalin yara matasa har su kamu da jaraba, abin da ya haddasa ƙarin matsalolin tunani, ciki har da damuwa, baƙin ciki, da ma yunkurin kashe kai.
Kamfanonin Meta (Instagram), TikTok da YouTube za su gurfana a gaban alkalan kotu a karo na farko, yayin da wata yarinya ‘yar shekara 19 da ake kira KGM ke jagorantar ƙarar, wadda za ta zama gwajin farko ga dubban irin waɗannan shari’u da ke shirin biyo baya a Amurka.
Masu ƙara sun ce kamfanonin sun yi amfani da dabaru irin na injinan caca da kamfanonin taba sigari wajen tsara manhajojinsu domin jawo hankalin yara, su daure su a ciki, su ƙara yawan tallace-tallace da riba. Idan kotu ta yarda da wannan hujja, hakan na iya karya garkuwar doka da ke kare kamfanonin fasaha daga ɗaukar alhaki.
Ana sa ran manyan shugabannin kamfanonin, ciki har da shugaban Meta Mark Zuckerberg, za su bayar da shaida a shari’ar da za ta ɗauki makonni shida zuwa takwas. A halin yanzu, fiye da jihohi 40 a Amurka sun riga sun kai ƙara kan Meta da TikTok bisa zargin cutar da lafiyar tunanin yara.
