Kamfanin Man Fetur na Ƙasa (NNPC) ya ɗauki wani sabon salo na warware matsalar matatun man fetur da suka dade suna gaza aiki, ta hanyar tattaunawa da wani kamfani daga ƙasar Sin. Wannan mataki na zuwa ne a daidai lokacin da Nijeriya ke neman rage dogaro da shigo da man fetur daga ƙasashen waje duk da kasancewarta babbar mai hakar danyen mai a Afirka.
Babban Daraktan NNPC, Bayo Ojulari, ya ce kamfanin na neman ƙwararrun masu sarrafa matatun mai a matsayin abokan jari, domin farfaɗo da matatun mai huɗu bayan shekaru na asara da rashin inganci. Wani binciken cikin gida ya nuna cewa matatun na cin kuɗi sosai saboda tsadar aiki da yawan biyan ‘yan kwangila, yayin da adadin man da ake sarrafawa ya kasance ƙasa.
Ojulari ya bayyana cewa kwamitin gudanarwar NNPC ya amince da shirin shigar da kamfanoni masu gogewa kai tsaye wajen sarrafa matatun, maimakon dogaro da ‘yan kwangila. Ya ƙara da cewa ana tattaunawa mai zurfi da masu zuba jari da dama, ciki har da wani kamfani daga Sin da ke da ɗaya daga cikin manyan masana’antun petrochemical a ƙasar, wanda zai kai ziyara matatar domin duba yanayinta.
Ya jaddada cewa NNPC ba ta sayar da matatun ba, sai dai za ta bai wa abokan hulɗa wani kaso na jarinsu ne domin matatun su iya ɗaukar nauyin kansu. Dakatar da ayyukan matatun a halin yanzu, a cewarsa, ya zo daidai da fara aikin Matatar Dangote, wadda ta ba da ɗan sauƙi wajen samar da man fetur a cikin gida.
Majiyar Labari: TVC NEWS
