Ambaliya mai tsanani a yankin gabashi na Democratic Republic of Congo ta shafi gidaje sama da 2,500, bayan koguna biyu sun cika suka mamaye kauyuka da dama. Rahotanni daga jami’an farar hula sun nuna cewa ruwan ya rufe gidaje tare da tilasta wa daruruwan mazauna barin muhallansu.
Shugaban ƙungiyar farar hula a Punia, Jean-Claude Ngoy, ya ce ruwan sama mai yawa a ‘yan kwanakin nan ya sa Kogin Congo da Kogin Ulindi suka cika, lamarin da ya shafi kauyukan Kasera, Tubila da Ulindi. A cewarsa, akalla gidaje 2,533 ne suka lalace ko suka nutse.
Ngoy ya yi kira ga hukumomin lardi da na ƙasa, da kuma kungiyoyin agaji, da su gaggauta kai dauki. Ya kara da cewa ambaliyar ta lalata muhimman ababen more rayuwa, ciki har da makarantu, cibiyoyin lafiya da hanyoyin samar da ruwan sha.
Tawagar tantancewa ta gargadi cewa mazauna yankunan da abin ya shafa na iya fuskantar karancin abinci, bayan gonaki da tafkunan kifi sun nutse cikin ruwa.
