Ma’aikatar tsaron Amurka (Pentagon) ta fitar da cikakkun bayanai kan kasafin tsaro na dala tiriliyan 1.5 da Donald Trump ya gabatar don shekarar 2027, wanda ake kallon sa a matsayin ɗaya daga cikin mafi girma a tarihin zamani. Wannan shiri na nuna ƙoƙarin Amurka na ƙara ƙarfin soja da sabunta kayan aiki.
Daya daga cikin manyan abubuwan da ke cikin shirin shi ne ƙirƙirar sabon tsarin kariya daga makamai masu linzami mai suna “Golden Dome,” wanda zai yi amfani da matakai daban-daban wajen gano barazana da kuma dakile ta. Haka kuma, an ware kusan dala biliyan 102 domin bunƙasa jiragen yaƙi, ciki har da ƙara yawan jiragen F-35 zuwa guda 85 da kuma ƙara samar da F-15EX Eagle II.
Kasafin ya kuma ba da muhimmanci sosai ga yaƙin zamani da ake yi da na’urorin drone. Jami’ai sun ce wannan shi ne mafi girman saka hannun jari da aka taɓa yi a fannin drone da tsarin yaƙi da su, tare da kashe kuɗi masu yawa kan sabbin drones masu cin gashin kansu, makamai na zamani, da kuma tsarin MQ-25 Stingray.
A cewar jami’an tsaro, manufar wannan shiri ita ce sabunta rundunar soji, ƙara shirin ko-ta-kwana, da kuma tabbatar da Amurka na gaba da kasancewa a gaba ta fuskar fasaha a cikin yanayin tsaron duniya da ke ƙara rikitarwa.
Majiyar Labari: AA
