Babban Bankin Nijeriya (CBN) ya yi kira da a samar da daidaito tsakanin amfani da kuɗin hannu (cash) da kuma biyan kuɗi ta hanyoyin dijital, domin tabbatar da cewa al’ummomin karkara, ’yan kasuwa na gargajiya da ƙananan masana’antu ba a barsu a baya ba yayin da ƙasar ke ƙara rungumar fasahar zamani.
Gwamnan CBN, Olayemi Cardoso, ya bayyana hakan ne a taron Committee of Heads of Bank Operations (CHBO) 2026 da aka gudanar a Legas, inda ya jaddada cewa duk da bunƙasar biyan kuɗi ta lantarki, kuɗin takarda har yanzu na da matuƙar muhimmanci a rayuwar yau da kullum, musamman a kasuwannin gargajiya da yankunan karkara.
Ya ce:
“Kuɗin hannu har yanzu shi ne ginshiƙi. Ba za a iya kawar da shi gaba ɗaya ba, musamman ga ƙananan kasuwanci da al’ummomin da ba su da cikakken damar fasahar dijital.”
CBN ta bayyana cewa a cikin shekaru biyar da suka gabata:
Yawan mu’amalolin lantarki ya ƙaru da kashi 276%
Darajar mu’amaloli ta tashi da kashi 581%
Kuɗin da ke yawo a hannu ya ƙaru da kashi 4.6% a 2025
Wannan na nuna cewa duk da bunƙasar biyan kuɗi ta waya, POS, ATM da katin banki, mutane har yanzu na buƙatar kuɗin takarda domin rayuwa ta yau da kullum.
CBN ta kuma ce ana duba sabon tsari kan adadin katunan banki da ATM, tare da nufin inganta rarraba kuɗi da sauƙaƙa samun su a ko’ina.
Shugaban CIBN, Farfesa Pius Olanrewaju, da shugaban CHBO, Abraham Aziegbe, duk sun goyi bayan cewa kuɗin hannu da na dijital dole su yi aiki tare domin ƙarfafa tattalin arziki da shigar jama’a cikin harkokin banki.
