Firgici da jimami sun mamaye birnin Maiduguri bayan wani mummunan harin bam da ya afku a cikin masallaci yayin sallar Magariba, lamarin da ya sake tuno wa al’umma irin raɗaɗin hare-haren ta’addanci da suka daɗe suna addabar yankin.
Wani bam da ake zargin ‘yan ƙunar-baƙin-wake ne suka dasa ya fashe a wani masallaci da ke kasuwar Gamborou a Maiduguri, inda rahotanni ke nuna cewa aƙalla mutane bakwai sun rasa rayukansu a ranar Laraba. Kamfanin labarai na AFP ya ambato shugaban ‘yan sa-kai Babakura Kolo yana tabbatar da adadin waɗanda suka mutu.
Duk da haka, babu wata ƙungiya da ta fito fili ta ɗauki alhakin harin. Kamfanin Reuters ya ruwaito cewa wani ganau ya ce sun ji wata ƙara mai ƙarfi kafin baƙin hayaƙi ya turnuƙe masallacin yayin da ake tsaka da sallar Magariba.
Kakakin rundunar ‘yansandan jihar Borno, ASP Nahum Daso, ya tabbatar da faruwar lamarin tare da bayyana cewa mutum bakwai ne aka tabbatar sun mutu, duk da cewa wasu rahotanni na nuni da cewa adadin na iya haura haka.
Birnin Maiduguri ya shafe shekaru yana fama da hare-haren ‘yan ta’addar Boko Haram, musamman hare-haren ƙunar-baƙin-wake da aka saba kaiwa masallatai da wuraren taruwar jama’a, tun bayan barkewar rikicin kungiyar a shekarar 2009.
