Gidan rediyon gwamnati na Isra’ila (KAN) ya ruwaito cewa Isra’ila na shirin yiwuwar samun amincewa daga Amurka domin kai hari kan tsarin makaman ballistic na Iran. Rahoton ya ce ana yin wadannan shirye-shirye ne a daidai lokacin da hankula ke kan ko Shugaban Amurka Donald Trump zai ba da umarnin kai farmaki kan Tehran.
Jaridar Haaretz ta bayyana cewa kimantawa daga hukumomin tsaron Isra’ila na nuna karuwar yiwuwar harin Amurka, musamman bayan sabbin tattaunawar Washington da Tehran. Jaridar ta ce har yanzu akwai manyan gibi a tsakanin bangarorin, ciki har da bukatar Amurka ga Iran ta daina tace uranium a cikin kasarta.
Rahotanni sun kara da cewa Isra’ila na sa ran Trump zai iya amfani da zabin soja idan tattaunawar ta gaza, tare da yiwuwar rundunar sojin Isra’ila ta shiga kai tsaye idan harin Amurka ya tabbata. Haka kuma an ce akwai hadin kai mai karfi tsakanin kasashen biyu a fannoni kamar leken asiri, sadarwar soja da kariyar sararin samaniya.
Wannan na faruwa ne yayin da ake ganin Amurka na kara karfafa rundunarta a Gabas ta Tsakiya. A gefe guda kuma, Iran, Rasha da China na shirin gudanar da atisayen soja na hadin gwiwa, yayin da Tehran ke gargadin cewa za ta mayar da martani ga duk wani hari.
Majiyar Labari:
