Kotun Koli ta Najeriya ta ba da umarnin a ci gaba da shari’ar zargin damfarar ₦1.35 biliyan da ake yi wa tsohon Gwamnan Jihar Jigawa, Sule Lamido, ’ya’yansa biyu da wasu mutane, bayan ta yi watsi da ƙorafin da suka shigar na cewa ba su da abin amsawa.
Kotun Koli ta tabbatar da hukuncin Kotun Tarayya da ke Abuja, wadda ta yi watsi da buƙatar no-case submission da Lamido da sauran waɗanda ake tuhuma suka shigar, tare da yanke hukuncin cewa akwai hujjojin da za su amsa a kansu.
Hakan ya biyo bayan hukuncin da Kotun Daukaka Kara da ke Abuja ta yanke a ranar 25 ga Yuli, 2023, inda ta soke tuhume-tuhumen guda 37 da Hukumar EFCC ta shigar, bisa hujjar cewa Kotun Tarayya ba ta da hurumin sauraron shari’ar. Sai dai Kotun Koli ta soke wannan hukunci gaba ɗaya.
A hukuncin da Mai Shari’a Abubakar Umar ya karanta, Kotun Koli ta tabbatar da hukuncin da Mai Shari’a Ijeoma Ojukwu ta yanke tun farko, inda ta umurci Lamido da sauran waɗanda ake tuhuma su shiga kare kansu.
A cewar EFCC, ana zargin Lamido da cin zarafin mukaminsa a tsakanin shekarun 2007 zuwa 2015, inda ake zargin ya karɓi kuɗaɗen rashawa daga kamfanonin da gwamnatin Jigawa ta ba kwangila, sannan aka wanke kuɗaɗen ta hanyoyi da dama.
Daga cikin waɗanda ake tuhuma akwai ’ya’yansa Aminu da Mustapha Lamido, da Aminu Wada Abubakar, tare da kamfanoninsu Bamaina Holdings Ltd da Speeds International Ltd.
A wani hukunci daban, Kotun Koli ta kuma yi watsi da ƙorafin Aminu Sule Lamido, ɗan tsohon gwamnan, kan hukuncin da aka yanke masa saboda gaza bayyana dala $40,000 a filin jirgin sama.
Kotun ta ce ƙorafin ba shi da tushe, inda ta tabbatar da hukuncin da Kotun Tarayya da ke Kano ta yanke a shekarar 2015, wanda ya umurci Aminu ya mika kashi 25 cikin 100 na kuɗaɗen da bai bayyana ba ga gwamnatin tarayya.
An kama Aminu ne a Disamba 11, 2012, a Filin Jirgin Sama na Mallam Aminu Kano, yayin da yake shirin tafiya zuwa Masar, inda aka gano cewa ya bayyana dala $10,000 kawai, alhali yana ɗauke da ƙarin $40,000 ba tare da sanarwa ba.
