Shugaban gwamnatin Refoundation ta Madagascar, Michaël Randrianirina, tare da matarsa da tawaga, sun tashi zuwa Moscow a daren Talata, 17 ga Fabrairu. Ziyarar ta zo ne bisa gayyatar gwamnatin Rasha, inda shugaban ya bayyana cewa tafiyar na nuna budaddiyar manufar kasarsa ga hadin gwiwa da kasashe daban-daban.
A cikin takaitaccen jawabi kafin tafiyarsa, shugaban ya jaddada cewa gwamnatin sa na goyon bayan multilateralism da kuma hadin kai a fannoni da dama. Ya ce Madagascar a shirye take ta yi aiki da kowace kasa muddin hakan zai amfanar da al’ummar Malagasy.
Wannan ita ce ziyarar hukuma ta farko da shugaban Madagascar ya kai Rasha cikin fiye da shekaru 40. A baya, marigayi Shugaba Didier Ratsiraka ya kai irin wannan ziyara a shekarar 1978, tafiyar da ta kasance mai muhimmiyar alama a tarihin siyasar kasar, musamman dangane da manufofin jamhuriya ta biyu.
Tun bayan hawansa mulki watanni hudu da suka gabata, gwamnatin Randrianirina ta nuna kusanci da Rasha. Shugaban ya karbi mulki ne bayan faduwar gwamnatin Andry Rajoelina sakamakon zanga-zangar matasa na Gen Z a watan Satumba 2025.
Majiyar Labari: AA
