Babbar Kotun Tarayya da ke Abuja ta ba da umarnin a gaggauta sauraron shari’ar da ake yi kan wasu maza biyar da ake zargi da hannu a harin bam na ginin Majalisar Dinkin Duniya (MDD) da aka kai a 26 ga Agustan 2011. Mai shari’a Emeka Nwite ya yanke hukuncin ne bayan lauyan masu gabatar da kara, Alex Izinyon (SAN), ya bayyana cewa shari’ar ta dauki kusan shekaru 15 tana jan lokaci, don haka ya dace a rika gudanar da ita kullum domin a kammala ta cikin gaggawa.
DSS na tuhumar Al-Barnawi da wasu mutane hudu bisa zargin hannu a harin. A zaman kotun da aka sake yi, wani babban jami’in DSS da ya gabatar da shaida ya ce duk binciken da suka gudanar ya kasance cikin kwarewa da bin doka. An gudanar da “trial-within-trial” ne domin tantance ko wadanda ake tuhuma sun bayar da bayanansu da son ransu ko kuwa an tilasta musu.
Shaidar, wanda kwararre ne a fannin binciken kwamfuta, ya bayyana cewa shi ne ya dauki bidiyon tambayoyin da aka yi wa wadanda ake zargin, amma bai iya tuna takamaiman watan da aka yi rikodin ba. Ya jaddada cewa na’urorin rikodi da DSS ke amfani da su ba sa yarda a gyara ko a katse su a tsakiya, domin suna rufe kansu ta hanyar dijital idan aka yi kokarin tsayawa, kuma ana adana rikodin a kan DVD biyu a lokaci guda.
Ya musanta zargin cewa an samu tsallake-tsallake a bidiyon ko kuma ba a gargadi wanda ake tuhuma kafin ya bayar da bayani ba, yana mai cewa duk wata mu’amala ta hukuma ana rikodinta gaba daya. An dage shari’ar zuwa ranar 4 ga Maris domin ci gaba da sauraron karar.
