Sojojin Operation Hadin Kai sun sake samun gagarumar nasara bayan kai farmaki a kan ‘yan ta’adda a karamar hukumar Konduga ta Jihar Borno, lamarin da ya kai ga ceto fararen hula uku da aka yi garkuwa da su tare da hallaka wasu daga cikin miyagun.
A cewar sanarwar da Laftanal Kanal Sani Uba ya fitar, an gudanar da samamen ne tare da hadin gwiwar CJTF, inda aka kwato bindigogi da kayan aikin ‘yan ta’addan. Rundunar ta ce wannan aiki ya nuna jajircewarta wajen ci gaba da kai hare-hare kan ‘yan ta’adda tare da kare rayuka, tare da tabbatar da cewa ana ci gaba da mamaye yankunan arewa maso gabas domin dawo da zaman lafiya mai dorewa.
