Dalilan da yasa Amurka ta haramta wa ƴan Najeriya da ƴan Nijar shiga ƙasar

Gwamnatin Amurka ta sanya Najeriya da Nijar cikin ƙasashen da aka taƙaita wa mutanensu shiga ƙasar, bisa dalilan tsaro da kuma matsalar tantance ƴan ƙasa, musamman a cikin al’amuran da suka shafi ƙungiyoyin tsattsauran ra’ayi kamar Boko Haram da ISWAP. Wannan matakin na zuwa ne a lokacin da ake ci gaba da muhawara kan zargin cin zarafi da kisan kiyashi ga Kiristoci a Najeriya. Gwamnatin Amurka ta bayyana cewa wannan haramcin zai shafi nau’ukan biza daban-daban, ciki har da na ɗalibai, ƴan yawon shakatawa, da masu kasuwanci. Hakanan, Amurka ta yi dakatar da bayar da biza ga mutanen Nijar saboda matsalar tsaro da hare-haren ta’addanci a ƙasar.