Mazauna wasu ƙauyuka a jihar Sokoto sun bayyana tsoro da mamaki bayan harin da Amurka ta kai a yankin, inda suka ce wurin da harin ya afka ba shi da alaƙa da ’yan ƙungiyar Daesh, sabanin bayanan da aka fitar a hukumance.
Mazauna ƙauyen Jabo da ke yankin Tambuwal a jihar Sokoto sun shaida wa CNN cewa babu wata alama ta zaman mayaƙan ƙungiyar Daesh a yankin kafin harin da Amurka ta kai. Sun ce harin ya zo musu a bazata, inda suka ji ƙarar fashewar bama-bamai da kuma ganin baƙin hayaƙi da misalin ƙarfe 10 na dare, lamarin da ya tilasta wa mutane ficewa daga gidajensu cikin firgici.
Wani mazaunin ƙauyen, Suleiman Kagara, ya ce ba su samu barci a daren ba, yana mai jaddada cewa ƙauyen Jabo ba shi da tarihin tsattsauran ra’ayi. Ya ƙara da cewa Musulmai da Kiristoci na rayuwa tare cikin zaman lafiya, ba tare da rikicin addini ba.
“A nan ƙauyen Jabo muna kallon Kiristoci a matsayin ’yan’uwanmu. Ba mu da rikicin addini, don haka ba mu yi tsammanin irin wannan hari ba,” in ji shi.
Haka nan, Bashar Isah Jabo, ɗan Majalisar Dokokin Jihar Sokoto mai wakiltar Tambuwal, ya bayyana yankin a matsayin wuri mai zaman lafiya, yana mai cewa babu wani tarihi na zaman ’yan Daesh, Lakurawa ko wata ƙungiyar ta’addanci a yankin.
Ya ce harin ya sauka ne a kusa da ƙauyen, kimanin mita 500 daga cibiyar kula da lafiya ta farko guda ɗaya tilo da ke yankin, abin da ya ƙara jefa fargaba a zukatan jama’a, duk da cewa babu rahoton jikkata.
A ranar Alhamis, Shugaban Amurka Donald Trump ya ce ƙasarsa ta kai gagarumin hari kan ’yan ta’addan ISIS (Daesh) a Arewa Maso Yammacin Nijeriya, yana zargin su da kai hare-hare musamman kan Kiristoci. Rundunar Sojin Amurka a Afirka (AFRICOM) ta tabbatar da harin, tana mai cewa an kashe ’yan ISIS da dama a Jihar Sokoto.
Kazalika, Ma’aikatar Harkokin Wajen Nijeriya ta tabbatar da hare-haren, tana mai cewa an kai su ne tare da haɗin gwiwar hukumomin Nijeriya, yayin da muhawara ke ci gaba kan sahihancin wurin da aka kai harin da tasirinsa ga fararen hula.
Majiyar Labari: Trt Hausa
