Shugaba Bola Tinubu ya nuna farin cikinsa kan yadda kasuwar hannayen jari ta Nijeriya (NGX) ta haura darajar ₦100 tiriliyan, yana mai cewa hakan alama ce ta ƙaruwa amincewar masu zuba jari. A wata sanarwa da kakakin shugaban ƙasa, Bayo Onanuga, ya fitar, Tinubu ya bayyana nasarar a matsayin “sabon yanayi” ga tattalin arziƙin ƙasa.
Tinubu ya ce NGX ta rufe shekarar 2025 da ribar kashi 51.19%, sama da ta 2024, tare da doke manyan kasuwannin duniya. Ya ƙara da cewa Nijeriya na daga cikin kasuwannin hannayen jari mafi tasiri a duniya, inda kamfanoni a sassa kamar masana’antu, bankuna da fasaha ke nuna ƙarfi.
Shugaban ya kuma nuna cewa raguwar hauhawar farashi da kwanciyar hankali a naira sun taimaka, yana jaddada cewa gwamnati za ta ci gaba da aiwatar da manufofin gyaran haraji da kuɗaɗe domin gina tattalin arziƙi mai ɗorewa.
