Hukumar Yaƙi da Sha da Fataucin Miyagun Ƙwayoyi ta Nijeriya (NDLEA) ta sake cafke wani tsohon fursuna mai shekara 80, Jeremiah Isaiah Nkanta, a Jihar Akwa Ibom, bayan gano ya koma harkar fataucin miyagun ƙwayoyi duk da cewa ya fito daga gidan yari shekaru kaɗan da suka wuce.
Kakakin NDLEA, Femi Babafemi, ya ce an kama Nkanta a ƙauyen Mmanta-Abak da ke Ƙaramar Hukumar Abak, inda aka same shi da kilogiram 5.7 na skunk, wani nau’in tabar wiwi. Ya tunatar da cewa an riga an kama Nkanta a watan Disambar 2022, inda kotu ta yanke masa hukuncin zaman gidan yari na shekaru biyu kan laifin fataucin ƙwayoyi.
A wani aiki daban, jami’an NDLEA sun kama wani ɗan kasuwa mai shekaru 37, Ani Onyebuchi Romans, a hanyar Oron–Ibaka, yayin da yake tafiya da mannequins da ake shirin kaiwa ƙasar Kamaru. Bincike ya nuna cewa an cika mannequins ɗin da kwayoyin tramadol masu nauyin kilogiram 5.3, waɗanda aka ce ya saya a Onitsha domin sayarwa a ƙetare.
A Jihar Oyo, NDLEA ta kama wasu shahararrun masu fataucin ƙwayoyi, ciki har da Remi Bamidele (Aluko the Mafia), inda aka ƙwace nau’o’in tabar wiwi daban-daban da motoci biyu. Haka kuma an kama wasu matasa tare da kuɗi sama da ₦1.3m a matsayin shaida.
A Jihar Edo kuma, an cafke wani ɗan aikawa da kaya tare da wasu mutane biyu, bayan gano Canadian Loud da Colorado a Benin City.
NDLEA ta ce waɗannan nasarori na daga cikin ƙoƙarinta na hana yaduwar miyagun ƙwayoyi da kuma cafke masu safararsu a faɗin ƙasar.
