Morocco ta kara mataki kusa da burinta na lashe AFCON a gida bayan ta doke Cameroon da ci 2-0 a wasan daf da na karshe da aka buga ranar Juma’a.
Brahim Diaz ne ya bude wa Morocco kofar cin kwallo, inda ya zura tasa ta biyar a wasanni biyar a gasar, kafin Ismael Saibari ya kara ta biyu a rabi na biyu. Nasarar ta tabbatar da cewa Morocco ce ta fi karfi a wasan.
Cameroon, wacce ke fatan tayar da kura duk da matsalolin da suka fuskanta kafin gasar, ta kasa nuna tasiri, inda tauraron Manchester United, Bryan Mbeumo, bai samu damar haskakawa ba.
Morocco, wacce ita ce ta fi kowa matsayi a Afirka kuma ta kai wasan kusa da karshe a gasar cin kofin duniya ta 2022, na fuskantar matsin lamba daga magoya bayanta domin lashe kofin karon farko tun 1976. Duk da shakku kan iya jure wannan matsin lamba, kungiyar na ci gaba da nuna kwarin gwiwa.
Wannan ne karo na farko da Morocco ta kai wasan dab da karshe na AFCON tun bayan da ta sha kaye a wasan karshe na 2004 da Tunisia. Yanzu za ta kara da wadda ta yi nasara a wasan Algeria da Najeriya, a ranar Laraba.
