Gwamnatin Najeriya ta bayyana matsayarta na rashin goyon bayan ƙudirin majalisar dattawa da ke neman gyara dokar yaƙi da ta’addanci domin a rika yanke wa masu garkuwa da mutane hukuncin kisa. Wannan matsaya ta fito ne bayan Ministan Shari’a kuma Lauyan Gwamnati, Lateef Fagbemi, ya jaddada cewa bai dace a rika amfani da hukuncin kisa ga masu sace mutane ba.
Fagbemi ya nuna damuwa cewa saka hukuncin kisa a cikin doka na iya janyo matsaloli a fannin haɗin gwiwar ƙasashen duniya, musamman ta fuskar miƙa masu laifi ga Najeriya. Ya bayyana cewa ƙasashe da dama na guje wa hukuncin kisa, don haka za su iya ƙin mika masu laifi idan suna fuskantar irin wannan hukunci. A cewarsa, “Dole ne a yi la’akari da illolin saka hukuncin kisa a doka, domin hakan na iya kawo cikas ga haɗin gwiwar ƙasashen duniya wajen yaƙi da ta’addanci.” Ya ƙara da cewa abokan hulɗar Najeriya da dama za su iya ƙin mika manyan masu laifi idan suna fuskantar barazanar hukuncin kisa.
Ministan ya kuma yi gargaɗi cewa irin wannan doka na iya mayar da wasu ƙasashe mafaka ga manyan masu laifi, ganin cewa kotunan ƙasashen waje na iya hana mayar da su Najeriya bisa hujjar kare haƙƙin ɗan’adam.
Ƙudirin majalisar dai ya tanadi yanke hukuncin kisa ga masu garkuwa da mutane ba tare da damar sassaucin hukunci ko tara ba. An karanta shi a karon farko a ranar 27 ga watan Nuwamba, sannan a karon na biyu a ranar 3 ga watan Disamba. Fagbemi ya gabatar da waɗannan hujjoji ne a taron jin ra’ayin jama’a da majalisar ta shirya tare da kwamitocin haƙƙin ɗan’adam, shari’a, tsaro da tattara bayanan sirri, da kuma ma’aikatar cikin gida.
