Gwamnatin Tarayyar Nijeriya ta jaddada muhimmancin inganta sadarwa da hadin kai tsakanin ma’aikatun gwamnati domin karfafa kokarin tabbatar da tsaron kasa. Ministan Yada Labarai da Wayar da Kai na Kasa, Mohammed Idris, ne ya bayyana haka yayin wata ziyara da ya kai wa Ministan Harkokin Cikin Gida, Olubunmi Tunji-Ojo, a Abuja.
Idris ya ce hadin gwiwa tsakanin ma’aikatu da hukumomin gwamnati zai taimaka wajen samar da ingantaccen martani ga kalubalen tsaro kamar ta’addanci da fashi da makami. Ya kuma bayyana cewa ma’aikatarsa na kokarin tattaunawa da sauran hukumomi domin fahimtar ayyukansu da kuma sanar da ‘yan kasa manufofin gwamnati da shirye-shiryenta.
A nasa bangaren, Ministan Harkokin Cikin Gida Tunji-Ojo ya ce wannan hadin gwiwa na da muhimmanci wajen yada bayanai kan sauye-sauyen da gwamnati ke yi, musamman a bangaren shige da fice da tsaron cikin gida. Ya kara da cewa gwamnati ta bullo da sabbin fasahohi don inganta tsaron kan iyaka da kuma saukaka ayyukan shige da fice.
Ministan ya kuma bayyana cewa gwamnatin ta samu nasarar magance jinkirin aikace-aikacen fasfo sama da 200,000cikin makonni biyu da rabi bayan hawanta mulki a 2023, tare da gabatar da sabbin hanyoyin sabunta fasfo ga ‘yan Nijeriya da ke kasashen waje.
