A wani gagarumin mataki na faɗaɗa harkokin banki a Gabashin Afirka, kamfanin Nedbank na Afirka ta Kudu ya sanar da shirin sayen mafi yawan hannun jarin bankin NCBA na Kenya, abin da ake ganin zai ƙara ƙarfafa haɗin gwiwar tattalin arziki a tsakanin manyan bankunan nahiyar.
Nedbank ya ce ya yi tayin sayen kashi 66 cikin 100 na NCBA a kan kuɗin rand biliyan 13.9 (kimanin dala miliyan 856), inda kashi 20% za a biya da kuɗi kai tsaye, sauran kuma da hannun jari.
Idan an kammala cinikin, NCBA zai zama reshen Nedbank amma zai ci gaba da amfani da sunansa, shugabancinsa na gida, da kuma kasancewa a kasuwar hannun jari ta Nairobi.
Shugaban Nedbank, Jason Quinn, ya ce sayen NCBA zai taimaka wa bankin wajen ƙarfafa kafarsa a Gabashi da Kudancin Afirka, yana mai nuna muhimmancin yankin a harkokin kasuwanci da hanyoyin ciniki tsakanin Afirka, Gabas ta Tsakiya da Asiya.
